Qué voi saber?

Apreni Idiòmes ei un ensem de servicis e recorsi electronics en un entorn web entar aprendissatge des tresaus lengües, adreçat especiaument as estudiants universitaris de Catalonha. Includís utisi e recorsi elaboradi pes universitats catalanes qu’ajuden a apréner idiòmes de faiçon autonòma, atau com informacion e documentacion sus es diuèrses opcions qu’es estudiants an ath sòn abast entà formar-se en idiòmes ena universitat.

Apreni Idiòmes conten recorsi, guides e activitats que t’ajudaràn a apréner idiòmes de faiçon autonòma: programes d’autoaprendissatge de lengües en linha, recorsi entà redactar en anglés o d’auti idiòmes, guides de convèrsa universitària, eca. Aufrís recorsi e utisi utils entar estudi, atau com recorsi especifics entà docents, com materiaus entara docéncia en anglés. En aguest apartat i trobaràs utisi entà gestionar era diversitat culturau que te pòden ajudar a relacionar-te eficaçament damb persones d’autes cultures e païsi.

Es recorsi virtuaus entar aprendissatge qu’aufrís Apreni Idiòmes son totaument gratuïts. Per çò que hè as recorsi, examens e certificats d’idiòmes, te’n pòs informar en cada universitat o centre.

Enes escòles e es servicis d’idiòmes des universitats i a ua ampla ofèrta de corsi, de diuèrses lengües, nivèus e modalitats d’aprendissatge (presenciaus o en linha). Tanben pòs accedir as corsi des escòles oficiaus d’idiòmes e der Institut Obèrt de Catalonha. Trobaràs tota era informacion en apartat «Corsi».

Es universitats catalanes organizen nombroses convocatòries d’examens que permeten d’obtier certificats oficiaus de coneishement d’idiòmes: eth CLUC e d’auti certificats d’idiòmes unversitaris. Tanben te pòs inscríuer enes pròves des escòles oficiaus d’idiòmes. Era informacion ei disponibla en apartat «Examens e certificats».

Er Marc europèu comun de referéncia entàs lengües (MECR) deth Conselh d’Euròpa establís uns critèris comuns en tota Euròpa que definissen es competéncies comunicatives en ua lengua determinada. Un nivèu B2 indique qu’er usatgèr a un domeni foncionau limitat en ua lengua, e que pòt desvolopar-se de faiçon eficaça en situacions quotidianes.

Segontes era Lei 1/2018, de 8 de mai, de modificacion dera Lei 2/2014, es estudiants que comencen es estudis universitaris de grad en ua universitat catalana en cors 2018-2019 e posteriors. Era Lei 1/2018 a establit ua moratòria deth requisit d’acreditacion de quate ans. Per tant, sonque seràn obligadi a acreditar eth B2, damb caractèr generau, es escolans que comencen es sòns estudis de grad a compdar deth cors 2018-2019. Totun açò, cau tier en compde que bères universitats catalanes dispausen de normatives academiques pròpries sus era acreditacion d’un determinat nivèu d’ua tresau lengua enes estudis de grad.

Es lengües que se pòden acreditar son es establides enes pròves d’accès ara universitat (PAU), qu’actuaument son es que seguissen: anglés, francés, alemanh e italian.

Era acreditacion se pòt obtier mejançant es certificats acreditatius de coneishement d’idiòmes, de nivèu B2 o superior, qu’agen reconeishuda era equivaléncia damb er Marc europèu comun de referéncia entàs lengües (MECR).

S’admeten es certificats que cònsten ena taula de certificats e diplòmes qu’acrediten es coneishements d’ua tresau lengua (anglés, francés, alemanh e italian) de nivèu B1 o superior, segontes er Marc europèu comun de referéncia entàs lengües deth Conselh d’Euròpa, annèxa ar Acòrd dera Junta deth Conselh Interuniversitari de Catalonha de modificacion der Acòrd de 24 d’abriu de 2015, sus eth reconeishement de certificats e titols acreditatius dera competéncia en lengües estrangères. Pòs trobar aquesta taula oficiau en apartat «Examens e certificats».

Era Generalitat de Catalonha e es universitats t’aufrissen diuèrsi tipes d’ajudes e bèques entà facilitar er aprendissatge d’idiòmes: ajudes entà pròves d’acreditacion deth nivèu B2 e entà corsi de tresaus lengües laguens deth programa Parla3, ajudes entara mobilitat internacionau (MOBINT), ajudes especifiques de cada universitat, eca. Trobaràs era informacion sus aguestes ajudes en apartat «Ajudes e bèques».

Es ajudes deth programa Parla3 e de MOBINT s’an de sollicitar a trauès dera Agéncia de Gestion d’Ajudes Universitàries e de Recerca (AGAUR). Entàs ajudes especifiques de cada universitat, pòs informar-te’n en servici lingüistic o centre d’idiòmes dera universitat.

Es programes d’escambi lingüistic e culturau des universitats catalanes t’aufrissen fòrça possibilitats de practicar e milhorar es lengües que ja coneishes o qu’aprenes. Pòs trobar tota era informacion sus aguesti programes en apartat «Escambi lingüistic».